100 börn-100 ár-1000 ára saga

Reykjavík

21. apríl 2015

13:00

Höfuðborgarsvæðið

Sýning í Þjóðminjasafni:   100 börn – 100 ár – 1000 ára saga

 

Nemendur í  4.-5.bekk (100 börn) Ingunnarskóla í Reykjavík hafa unnið listaverk í tengslum við 100 ára afmæli kosningarréttar kvenna. Leiðarljós verksins er umræða um jafnrétti og samtal milli barnanna og fjölskyldna þeirra. Setningarnar á „visku“stykkjum eru afrakstur samtals á milli nemenda og nánustu fjölskyldu með áherslu á ömmur og afa. Fjölskyldan átti að koma sér saman um eina setningu um jafnrétti sem nemandinn átti að skrifa.

 

Setningin er skrifuð á viskustykki vegna þess að það er hlutur sem er í daglegri notkun á heimilum og hægt er að leika sér með merkingu orðsins.

 

Einnig er þess minnst að það eru 1000 ár frá fæðingu Ingunnar Arnórsdóttur nunnu sem skólinn er kenndur við. Ingunn var íslensk menntakona og kennari á 12. öld. Hún var á Hólum hjá Jóni biskupi Ögmundssyni og er fyrsta íslenska konan sem sögur fara af sem var menntuð í latínu og öðrum fræðum til jafns við pilta og kenndi þeim líka. Frá henni segir í sögu Jóns biskups:

 

„Þar var og í fræðinæmi hreinferðug jungfrú, er Ingunn hét. Öngum þessum var hún lægri í sögðum bóklistum, kenndi hún mörgum grammaticam og fræddi hvern er nema vildi; urðu því margir vel menntir undir hennar hendi. Hún rétti mjög latínubækur, svo að hún lét lesa fyrir sér, en hún sjálf saumaði, tefldi, eða vann aðrar hannyrðir með heilagra manna sögum, kynnandi mönnum guðs dýrð eigi aðeins með orðum munnnáms, heldr og með verkum handanna.”

 

Ásamt því að kenna prestsefnum latínu, stundaði Ingunn útsaum og er talið að hún hafi meðal annars saumað altarisklæði um heilaga Maríu og ævi St. Marteins. Bæði þessi klæði eru nú á erlendum söfnum. Ingunn Arnórsdóttir hefur einnig verið nefnd meðal heimildarmanna Odds Snorrasonar munks á Þingeyrum að Ólafs sögu Tryggvasonar Noregskonungs.

 

Styttan af Ingunni er samvinnuverkefni þar sem öll 100 börnin hjálpuðust að og er gerð úr endurunnið efni.